Euskadiko Fisioterapeuten Elkargo Ofiziala

2015 // 06 // 23 - EFEO-K PRENTSA AHORRA

Euskal fisioterapeutek bizkarreko mina arintzeko nola igeri egin behar den azaldu dute

Elkargoaren www.cofpv.org webgune berriaren nahiz youtube-ko kontuaren bitartez eskuragarri dagoen bideoak patologia bakoitzari dagokion igeriketa-estilo espezifikoa aukeratzen irakasten du

Euskadiko Fisioterapeuten Elkargo Ofizialak (EFEO), Madrilgo, Kataluniako eta Nafarroako elkargoekin batera, bideo-gomendio berri bat plazaratu du, lesioak saihestea xede duen “12 hilabete, 12 osasun-gomendio” kanpainaren barruan.

“Udaren etorrerarekin batera, ekainean, igeriketari buruzko gomendioa zabaldu dugu, bi ikuspegitatik begiratuta: zein den behar bezala igeri egiteko modua, eta nola igeri egin behar den lesioak hobetu edo saihesteko”, adierazi du Jon Herrero EFEOko presidenteak.

Honela, bideo-kontseiluaren bitartez, euskal fisioterapeutek tximeleta-eran ez igeri egitea gomendatzen dute bizkarrean arazorik izanez gero, bereziki gogoan izanda estilo horrek bizkarrezurraren kurbatura areagotzen duela, hiperlordosi lunbarra eta biratzaileen mahukatxoetako (sorbaldari egonkortasuna ematen dion gihar-tendoien multzoa) lesioak izateko arriskua handituz.

Hortaz, adituek patologiaren araberako estilorik egokiena aukeratzea gomendatu dute. Adibidez, zerbikaletan arazoak izanez gero, crawl-igeriketa gomendatzen da burua uretik kanpora aterata, baita ohiko crawl-igeriketa, ohiko bizkar-igeriketa eta, batez ere, bular-igeriketa, baldin eta errektifikazioa lortu nahi badugu, eta hiperlordosia izatekotan, bizkar-igeriketa, kokotsa bularrerantz hurbilduz.

Hiperzifosi dortsala duten pertsonei, crawl-igeriketa egitea gomendatu diete, burua kanpora aterata eta hiperestentsio zerbikalik gabe, edota bizkar-igeriketa, kokotsa bularretik aldenduz. Era berean, patologia lunbarra dagoenean, crawl-igeriketa praktikatu behar da, burua barrura sartuta, eta hiperlordosia izanez gero, bizkarigeriketa eta bular-igeriketa bertikaleko ariketa guztiak. Gainera, sorbaldako arazoak izatekotan, crawl eta bizkar igeriketa-estiloak saihestu eta bular-igeriketa praktikatu behar da.

Uretan ariketa egitearen onurak

Bestalde, fisioterapeutek gogoratu dute uretan murgiltzeak ondorio onuragarriak dituela osasunarentzat, drainatze efektua kasu, eta uretan pisua txikiagoa denez, oso mesedegarria da ebakuntza-ondoko prozesuetarako, artrosia edo artritisa duten pertsonentzat, haurdunentzat, etab.

Gainera, adineko pertsonek duten erortzeko arriskua murriztu eta muskulatura indartzeko aukera ematen du, giltzadurak kargatu gabe. “Ez da beharrezkoa igeri egiten jakitea; nahikoa da uretan ibiltzea onurak lortzeko”, azaldu du Jon Herrerok.

Era berean, fisioterapia akuatikoaren helburua errehabilitazioa edota xede fisiko eta funtzional espezifikoak lortzea dela gogoratu du. “Lortutako emaitzek argi utzi dute jarduera fisikoa terapeutikoa dela, zeinahi ingurunetan eginda ere, eta estrategia ona dela patologia kroniko muskulo-eskeletikoa duten pazienteengan kontuan izan ohi diren aldagaiak (bizi-kalitatea, osasun fisiko eta mentalaren egoera orokorra, gaitasun funtzionala eta mina) hobetzeko”, ziurtatu du.

Era berean, uretan egiteko moduko ariketa batzuk gomendatu ditu bizkarreko mina aritzeko:

1. Sakonera desberdinak dituen igerileku bat aukeratu. Entrenamenduak ura gerriraino eta bularreraino iristen zaizula egin behar dituzu. Egiazta ezazu igerilekuak esparrua bereizia duela ariketak nork bere karrilean egin ahal izateko, igerilariengandik urrun edota igeriketa-ingurune ireki batean.

2. Uretan erabiltzeko moduko oinetakoak erosi, egonkortasun edo oreka arazoak badituzu. Honelako oinetakoak zapata-denda gehienetan eta online saltokietan eskura daitezke. Urarekiko erresistentzia duen ehunaz eginda daude, eta trakziodun zolak dituzte, igerilekuko zoruarekin hobeto itsasteko.

3. Igerilekura oinez sartu, jauzi egin edo zeure burua bota beharrean.

4. Ahal dela, ariketa-errutina bat osatu astean hiru aldiz, eta bi astetan edo hilabete batean, goitik behera murriztuko zaizu bizkarreko mina. Uretako ariketak egiten ez dituzun egunetan, ibili eta luzatze-ariketa arinak egin, giharretako mina murrizteko.

5. Atseden hartu errutina hau bete ondoren, eta ur asko edan aurretik eta geroztik, giharrak ondo hidratatzeko.

6. Taldeka entrenatzea gustuko baduzu, ariketa aerobiko akuatikoen gela batean matrikula zaitez. Hasi aurretik, irakasleari jakinarazi behar diozu zein den bizkarrean duzun arazoa, ariketak horren arabera egokitu ahal izateko.

7. Ariketa apurka-apurka gehitu. Lehendabizi, 10 minutu inguruko ariketa egin, eta ondorengo asteetan 5na minutu gehitu, 30-45 minutuko iraupena lortu arte.

Euskadiko Fisioterapeuten Elkargo Ofizialak (EFEO) 2.000 profesional baino gehiago biltzen ditu autonomia erkidego osoan.