Euskadiko Fisioterapeuten Elkargo Ofiziala

2019 // 05 // 22 - EFEO-K PRENTSA AHORRA

Fisioterapia aurrekirurgikoak ebakuntzaren ondorengo susperraldia bizkortzen du

Maiatzeko “12 hilabete, 12 osasun-gomedio” kanpainaren bidez, horrelako ebakuntzak jasotzen dituzten pazienteen susperraldian fisioterapia aurrekirurgikoak duen garrantziari buruz kontzientziatu nahi da

Fisioterapeutek gogorarazten dute osasun-profesionalak direla pazienteak ebakuntzaren ondoren egingo dituen gorputz-kontzientziazko eta sentikortasun propiozeptibozko ariketetarako jarraibideak emateko arduradunak

Euskadiko Fisioterapeuten Elkargo Ofizialak (EFEO) fisioterapia aurrekirurgikoaren garrantzia azpimarratzen du, horrelako ebakuntzak jasotzen dituzten pazienteen susperraldia bizkortzeko.

Horixe azaltzen da Euskadiko Fisioterapeuten Elkargo Ofizialaren maiatzeko bideo-aholkuan, “12 hilabete, 12 osasun-gomendio” kanpainaren barruan. Kataluniako Fisioterapeuten Elkargoarekin, Madrilgo Erkidegoko Fisioterapeuten Elkargo Profesionalarekin, Nafarroako Fisioterapeuten Elkargo Ofizialarekin, Galiziako Fisioterapeuten Elkargo Ofizialarekin, Valentziako Erkidegoko Fisioterapeuten Elkargo Ofizialarekin eta Kantabriako Fisioterapeuten Elkargo Profesionalarekin elkarlanean gauzatzen du kanpaina hori EFEOk, eta maiatzeko gaia ebakuntza kirurgiko baten aurreko fisioterapia-tratamenduaren garrantziari buruz kontzientziatzea da: https://www.youtube.com/watch?v=5uP5xGt6ZHg

Horiek horrela, fisioterapeutek azaltzen dute ebakuntza ondoko fisioterapiak onura eztabaidaezinak ekartzen dituela pazienteak indarra, mugikortasuna eta funtzionalitatea berreskura ditzan, baina oraindik ere ez zaiola behar besteko garrantzia ematen kirurgia aurreko prozesuari. “Gaur egun, ebakuntza kirurgiko gehienak programatuak dira. Oso garrantzitsua da ebakuntza-gelara ahalik eta prestatuen iristea; izan ere, gorputza gero eta prestatuago egon, orduan eta arinagoa izango da susperraldia”, azaldu du June Ruizek, Euskadiko Fisioterapeuten Elkargo Ofizialeko presidenteordeak.

Zentzu horretan, ebakuntza-gelan sartu aurretik fisioterapeutarekin onuragarrienak diren ariketa eta tratamenduak kontsultatzeak duen garrantzia azpimarratzen dute. “Erditzeko prestakuntzarako eskolekin egiten den bezalaxe, pazienteak prest egon behar du ebakuntzara ahalik eta mugikortasun-, elastikotasun-, indar- eta zirkulazio-baldintza onenetan iristeko”, gogorarazten du Ruizek.

Horrenbestez, bideo-aholkuaren bidez azaltzen da ariketa fisiko terapeutikoa dela pazientea ebakuntzara prest iristeko tratamendurik onena. Hori bai, Ruizek adierazten duen moduan, “paziente bakoitzaren forma fisikoari eta minarekiko tolerantziari egokitu beharko da”.

Izan ere, osasun-profesionalak dira pazienteak ebakuntzaren ondoren egingo dituen gorputz-kontzientziazko eta sentikortasun propiozeptibozko ariketetarako jarraibideak emateko arduradunak, ohiko funtzionalitatea berreskura dezan laguntzeko. Hortaz, ariketak ebakuntza aurretik gero eta gehiago praktikatzen diren heinean, orduan eta errazagoa eta arinagoa izango da ebakuntza ondoko prozesua. “Gainera, mota horretako ariketak ez dira esklusiboak hezur- eta muskulu-sistemako lesioetarako; bihotz-biriketako kirurgietan, transplanteetan eta minbizi-kirurgia baten aurretik ere egin daitezke”, esan du, amaitzeko, June Ruizek.