Euskadiko Fisioterapeuten Elkargo Ofiziala

2025 // 06 // 19 - EFEO

OSTEOPATIA, ARLO SANITARIOKO ESKUMEN ESKLUSIBOA

Osteopatia eskuzko teknika terapeutikoa da, nahasmendu muskuloeskeletikoen eta gorputzeko beste desoreka batzuen diagnostikoa, tratamendua eta prebentzioa egiten duena

Euskadiko Fisioterapeuten Elkargo Ofizialak biztanleria sentsibilizatu nahi du, tratamendu seguruak, eraginkorrak eta ebidentzia zientifikoan oinarrituak bermatzeko profesional gaituengana jotzeak duen garrantziari buruz

Ekainaren 22an, hurrengo igandean, Osteopatiaren Mundu Eguna ospatuko da; egun gakoa da proposamen terapeutiko horren garrantzia balioesteko eta gogorarazteko langile sanitarioei baino ez dagokiela horretan jardutea, bereziki, fisioterapeuten kolektiboari, Espainian indarrean dagoen legediak ezartzen duen moduan. Euskadiko Fisioterapeuten Elkargo Ofizialak (EFEO) aukera hori aprobetxatu nahi du biztanleria sentsibilizatzeko, tratamendu seguruak, eraginkorrak eta ebidentzia zientifikoan oinarrituak bermatzeko profesional gaituengana jotzeak duen garrantziari buruz.

Osteopatia, ehun eta berrogeita hamar urte baino gehiagoko ibilbidea duen osasun-tresna

Osteopatia pertsonaren ikuspegi integralean oinarritzen da, organismoaren oreka asaldatzen duten mugikortasun-disfuntzioak identifikatu eta zuzentzeko xedez. Eskuzko balorazio zehatz baten eta anatomia, fisiologia eta biomekanikako ezagutza trinkoetan oinarritutako manipulazio-teknika espezifikoen bidez, osteopatian prestakuntza jaso duen fisioterapeutak leheneratze funtzionala landu, mina arindu eta osasun-egoera globala hobetzen du.

Duela 150 urte baino gehiago, terapia horrek erakutsi du eraginkorra dela min neuromuskuloeskeletikoak tratatzeko, hala nola lunbalgia, zerbikalgia, ziatika, tentsio-tipoko buruko mina edo erraietako disfuntzioak. Ildo horretatik, EFEOk bere konpromisoa berretsi du tresna terapeutiko hori etengabe eguneratzeko, ikerketa zientifikoa sustatu eta jardunbide egoki klinikoak zabaltzeko.

Osasuna eta lanbidea babesteko deia

Zalantzarik gabe, osteopatian prestakuntza gehigarri sakona jaso duen Fisioterapiako profesionalak erabiltzailearekiko profesionaltasuna eta segurtasuna bermatzen du. Hori dela eta, ezinbestekoa da ulertzea osteopatia, proposamen terapeutiko gisa, titulazio egokia duten osasun-profesionalek baino ezin dutela gauzatu, bere izaeragatik eta manipulazio-tekniken konplexutasunagatik. Interpretazio formal hori bat dator Auzitegi Gorenak horren inguruan emandako azken epaiarekin (2021ekoa); horren bidez, adierazi zen praktika hori gaituta dauden osasun-profesionalek bakarrik egin zezaketela, osasun-zentro edo -zerbitzuetan.

Hori dela eta, fisioterapeuta gaituek aplikatutako osteopatiak, pazientearen bizi-kalitatea hobetzeaz gain, osasun-sistema publikoen efizientziari eta jasangarritasunari laguntzen die.

Prestakuntza-jardunaldia

Ospakizun hori dela eta, Euskadiko Fisioterapeuten Elkargo Ofizialaren (EFEO) Eskuzko Fisioterapia Osteopatiko Taldeak lineako doako jardunaldia antolatu du ekainaren 28rako: Eskuzko Fisioterapia Osteopatikoaren I. Jardunaldia. Bertan, tresna terapeutiko horrekin trata daitezkeen hainbat patologia jorratuko dira.

Jardunaldiari buruzko informazio osoa eskura duzue esteka honetan: https://www.cofpv.org/eu/cursos/2025/osteopatia/osteopatia.asp

EFEOri buruz

Euskadiko Fisioterapeuten Elkargo Ofizialak 3.572 elkargokide ditu* (% 69 emakumeak eta % 31 gizonak), geografikoki honela banatuta: % 45,4 Bizkaian, % 39,4 Gipuzkoan eta % 14,7 Araban. EFEOren helburua da sektoreari eragiten dion indarreko araudiari buruzko informazio garrantzitsua eta eguneratua eskaintzea, baita aholkularitza berezitua ematea ere Fisioterapiari lotutako gaietan, segurtasun-berme osoz lan egiten duen kolektibo lehiakorra izateko xedez.

*2024/12/31ko datuak